პირველად საქართველოში, სამედიცინო ცენტრ "მედიქლაბჯორჯიას" საერთაშორისო აკრედიტაცია მიენიჭა

პირველად საქართველოში, სამედიცინო ცენტრ "მედიქლაბჯორჯიას" საერთაშორისო აკრედიტაცია მიენიჭა

გაერთიანებულმა კომისიამ - Joint Commission International-მა (JCI) საქართველოში პირველად სამედიცინო ცენტრ „მედიქლაბჯორჯიას“ საერთაშორისო აკრედიტაცია მიანიჭა. აღნიშნულთან დაკავშირებით გამართულ ღონისძიებას შრომის, ჯანმრთელობისა და სოციალური დაცვის მინისტრი დავით სერგეენკო დაესწრო და ქვეყანაში ჯანდაცვის სისტემის განვითარებისთვის ამ სიახლის მნიშვნელობაზე გაამახვილა ყურადღება.

„საქართველოში ეს პირველი შემთხვევაა და მოხარული ვარ, რომ ამ გუნდმა ეს შეძლო. ზუსტად ვიცი, ამას რამდენიმეწლიანი, ინტენსიური მუშაობა დასჭირდა. ეს მნიშვნელოვანია, მთლიანად ქართული ჯანდაცვისთვის იმიტომ, რომ გაჩნდა ხარისხის სტანდარტის ახალი თამასა, რომელსაც მჯერა, სხვა დაწესებულებებიც აუბამენ მხარს,“ - აღნიშნა დავით სერგეენკომ.

JCI აუდიტორთა ჯგუფმა სამედიცინო ცენტრ „მედიქლაბჯორჯიას“ საქმიანობის სრული სპექტრი, როგორც სტაციონარული, ასევე ამბულატორიული და სასწრაფო- გადაუდებელი მომსახურებისათვის, ჰოსპიტალური სერვისებისათვის დადგენილ სტანდარტებთან შესაბამისობაზე შეაფასა. კრიტერიუმები მომსახურების ყველა ასპექტს - პაციენტის უსაფრთხოებას, ჯანმრთელობის შეფასებისა და მკურნალობის სქემებს, მედიკამენტების მენეჯმენტს, ინფექციების პრევენციასა და კონტროლს, ქირურგიულ და საანესთეზიო, ასევე ლაბორატორიულ და ინსტრუმენტულ სადიაგნოსტიკო სერვისებს, საექთნო მოვლას, სამედიცინო მომსახურების ხარისხის გაუმჯობესებაზე ზრუნვას, პაციენტისა და მისი ოჯახის წევრების უფლებების დაცვას, სამედიცინო ჩანაწერების წარმოებასა და ინფორმაციის კომუნიკაციას, პერსონალის განათლებასა და კვალიფიკაციას, შენობის ინფრასტრუქტურასა და უსაფრთხო ოპერირებას, კლინიკური მენეჯმენტის ეფექტურობას, ასევე სასწავლო რესურსების ცენტრის საქმიანობას მოიცავდა.

სამედიცინო ცენტრი „მედიქლაბჯორჯია” პირველი კლინიკაა საქართველოში, რომელიც ჰოსპიტალური სერვისების ხარისხისა და პაციენტის უსაფრთხოების უზრუნველყოფისთვის დადგენილი აშშ-ის სტანდარტების კრიტერიუმებს სრულად აკმაყოფილებს და მსოფლიოს მასშტაბით ანალოგიური აკრედიტაციის მქონე 600 ჰოსპიტალს შორისაა.

JCI აკრედიტაცია სამედიცინო მომსახურების ხარისხის დემონსტრირების საშუალებად განიხილება და გლობალურ ჯანდაცვაში ოქროს სტანდარტადაა აღიარებული. JCI აშშ-ში მოქმედი ყველაზე მსხვილი სააკრედიტაციო ორგანიზაცია The Joint Commission-ის შვილობილ კომპანიასა და საერთაშორისო ფილიალს წარმოადგენს.

საერთაშორისო აკრედიტაციის, კონსულტაციების, პუბლიკაციებისა და საგანმანათლებლო პროგრამების მეშვეობით JCI The Joint Commission-ის მისიის აღსრულებას გლობალურ დონეზე უზრუნველყოფს და მსოფლიოს 90 ქვეყანაში, ჯანდაცვის სფეროში მოღვაწე საერთაშორისო ორგანიზაციებს, საზოგადოებრივი ჯანდაცვის სააგენტოებს, სამინისტროებსა და სამედიცინო დაწესებულებებს მომსახურების ხარისხის შეფასებასა და პაციენტის უსაფრთხოების გაუმჯობესებაში ეხმარება.

უსუფაშვილი: სალომე ზურაბიშვილი ღირსეული კანდიდატია, სიამოვნებით ვეპაექრები

უსუფაშვილი: სალომე ზურაბიშვილი ღირსეული კანდიდატია, სიამოვნებით ვეპაექრები

07 აგვისტო, 2018

სალომე ზურაბიშვილი ღირსეული კანდიდატია, სიამოვნებით ვეპაექრები,-ამის შესახებ „შენების მოძრაობის“ საპრეზიდენტო კანდიდატმა, დავით უსუფაშვილმა ჟურნალისტებთან განაცხადა. „ქართულმა ოცნებამ“ ვერ შეძლო საკუთარ წიაღში საპრეზიდენტო...

ახალი სტატიები