თეთრიწყაროსთან 20 კგ-მდე ცხოველის სხეულის ნარჩენის დაყრისთვის მოქალაქე 150 ლარით დაჯარიმდა
გარემოსდაცვითი ზედამხედველობის დეპარტამენტის ქვემო ქართლის რეგიონული სამმართველოს გარემოსდაცვითი პატრულირებისა და სწრაფი რეაგირების განყოფილების თანამშრომლებმა ნარჩენების მართვის კოდექსის წესების დარღვევის ფაქტები გამოავლინეს.
დეპარტამენტის ინფორმაციით, გარდაბნის მუნიციპალიტეტის სოფელ მარტყოფში, მოქალაქემ 2კგ-მდე მუნიციპალური ნარჩენი დაყარა. შედგა საჯარიმო ქვითარი – ადმინისტრაციული სამართალდარღვევის ოქმი. მოქალაქეს განესაზღვრა საჯარიმო სანქცია 80 ლარის ოდენობით.
ნარჩენების მართვის კოდექსის წესების დარღვევის ფაქტს ჰქონდა ადგილი ასევე თეთრიწყაროს მუნიციპალიტეტის მიმდებარედ, სადაც მოქალაქემ 20კგ-მდე ცხოველის სხეულის ნარჩენი დაყარა. შედგა საჯარიმო ქვითარი – ადმინისტრაციული სამართალდარღვევის ოქმი. მოქალაქეს განესაზღვრა საჯარიმო სანქცია 150 ლარის ოდენობით.