- Advertisement -

საგანგებო შტაბი: ამ დროისათვის არ არსებობს მოხალისეების ჩართვის არანაირი აუცილებლობა

330

ბორჯომის მუნიციპალიტეტში გაჩენილი ხანძრის კერების ლოკალიზებისა და შემდგომი ლიკვიდაციის მიზნით, მობილიზებულია ყველა შესაბამისი უწყება. მთავრობა, პრემიერ-მინისტრის გიორგი კვირიკაშვილის ხელმძღვანელობით, საგანგებო რეჟიმში მუშაობს. შტაბის საქმიანობას შინაგან საქმეთა მინისტრი გიორგი მღებრიშვილი ხელმძღვანელობს. აღნიშნულის შესახებ საგანგებო შტაბის განცხადებაშია აღნიშნული.

მათი ინფორმაციით, მობილიზებულია მძიმე ტექნიკა და ცოცხალი ძალა, რომელიც გზის გაყვანის სამუშაოებს ახორცილებს. შეუჩერებლად მუშაობენ სახანძრო-სამაშველო ბრიგადები.

"ადგილზე იმყოფება 270-ი მაშველი. ქართულ ავიაციასთან ერთად, რამდენიმე საათში, ხანძრის ლიკვიდაციის სამუშაოებში ჩაერთვება აზერბაიჯანული და თურქული მხარეც, რომლებიც დამატებით ვერტმფრენებს გამოაგზავნიან. ამ დროისათვის არ არსებობს ხანძრის დასახლებულ პუნქტებზე გადასვლის საფრთხე. საგანგებო შტაბი ეხმაურება სხვადასხვა პირების მიერ სოციალური ქსელებით და თუ სხვა საშუალებებით გავრცელებულ ინფორმაციას, მოხალისეების მობილიზების შესახებ. ამ დროისათვის არ არსებობს მოხალისეების ჩართვის არანაირი აუცილებლობა. უფრო მეტიც, ნებისმიერი გარეშე პირის, ხანძრის მიმდებარე პერიმეტრზე გამოჩენა ხელს შეუშლის მეხანძრეების, მაშველების და შესაბამისი უწყებების მიერ მობილიზირებული ცოცხალის ძალისა თუ ტექნიკის მუშაობას. საგანგებო აღჭურვილობის გარეშე ხანძრის კერებთან მიახლოება არის საშიში. საგანგებო შტაბი მიმართავს ყველა მოქალაქეს, თავი შეიკავოს თვითნებური გადაწყვეტილებებისაგან და ნუ შეუქმნიან დამატებით პრობლემას მეხანძრეებსა და მაშველებს, რომლებიც სტიქიას ებრძვიან",-ნათქვამია განცხადებაში.

Comments
Loading...