უფრო დიდი, გაერთიანებული ევროკავშირი გააძლიერებს ჩვენს ხმას მსოფლიოში, ეს არის ისტორიული მომენტი და ის ხელიდან არ უნდა გავუშვათ, უნდა ვუპასუხოთ ამ მოწოდებას უკრაინისთვის, დასავლეთ ბალკანეთისთვის, მოლდოვისთვის და იმედია, საქართველოსთვის, – ამის შესახებ ევროკომისიის პრეზიდენტმა, ურსულა ფონ დერ ლაიენმა გერმანიის შარლემანის საერთაშორისო ჯილდოს მიღებისას სიტყვით გამოსვლისას განაცხადა.
"ევროპის იმ ქვეყნების მიღება, რომლებმაც გააკეთეს თავისუფალი არჩევანი, შეუერთდნენ ჩვენს კავშირს, არ არის მხოლოდ მორალური აუცილებლობა ევროპისთვის. ეს არის უფრო ძლიერი ევროპის წინაპირობა – სახლში და გეოპოლიტიკურად მსოფლიოში. უფრო დიდი, გაერთიანებული ევროკავშირი გააძლიერებს ჩვენს ხმას მსოფლიოში. ეს დაგვეხმარება დამოკიდებულების შემცირებაში. ეს უზრუნველყოფს, რომ მთელ ევროპაში გაძლიერდეს დემოკრატია, კეთილდღეობა და სტაბილურობა. რა თქმა უნდა, გაწევრიანება ყოველთვის იქნება დამსახურებაზე დაფუძნებული პროცესი, თუმცა დარწმუნებული ვარ, რომ ისტორია ახლა გვეძახის. როგორც ეს 1989 წელს მოხდა, როდესაც ცვლილებების ქარმა მთელ ევროპაში დაუბერა. ყოველ დღე ჩვენ უკრაინაში ვხედავთ, რას ნიშნავს ბრძოლა თავისუფლებისთვის. ჩვენ ვხედავთ მსხვერპლს, რომელზე წასასვლელად ხალხი მზად არის ბოლო სამ-ნახევარი წელია. ასე რომ, დიახ, ეს არის ისტორიული მომენტი და ჩვენ არ უნდა გავუშვათ ის ხელიდან. უნდა ვუპასუხოთ ამ მოწოდებას. უკრაინისთვის, დასავლეთ ბალკანეთისთვის, მოლდოვისთვის და იმედია, საქართველოსთვის, ყველასთვის, ვინც თავისი არჩევანი გააკეთა, თავისუფალი და მშვიდობიანი მომავლისთვის ჩვენს კავშირში, უფრო ძლიერი და დამოუკიდებელი ევროპისთვის“, – განაცხადა ურსულა ფონ დერ ლაიენმა.
შარლემანის საერთაშორისო პრიზი 1988 წლიდან ყოველწლიურად გერმანიის ქალაქ აახენში ევროპის გაერთიანებაში შეტანილი წვლილისთვის გადაეცემა.
თარგმანი საქართველოს საზოგადოებრივ მაუწყებელი.
