"სოციალური სამართლიანობის ცენტრის" იურისტი მარიამ პატარიძე აცხადებს, რომ "აგენტების კანონის" საწინააღმდეგო აქციებზე დაკავებულთა აბსოლუტური უმრავლესობა ნაცემია.
მისი თქმით, ადვოკატთა ქსელში დაახლოებით 160 შეტყობინებაა შესული.
"ადვოკატთა ქსელში შემოსული არის დაახლოებით 160 შეტყობინება და ჩვენ ყველა მათგანთან შეხვედრა და კომუნიკაცია უკვე მოვახერხეთ. რა თქმა უნდა, მათ შორის არიან დღეს დილით დაკავებულები. აბსოლუტური უმრავლესობა არის ნაცემი და ჩვენ ბოლო დღეებია ვხედავთ ხელისუფლების მიერ გაცხადებულ ნადირობას მშვიდობიანი დემონსტრანტების მიმართ, რომლებიც არა რომელიმე უცხო ძალის, არამედ კარგად ნაცნობი ოკუპანტის გავლენების გასაპროტესტებლად არიან განგრძობად რეჟიმში ქუჩებში გამოსული.
მიუხედავად იმისა, რომ ეს ადამიანები არიან ნაცემები, არიან ძალიან მხნედ და გული მხოლოდ იმაზე სწყდებათ, რომ ახლა ჩვენ გვერდით არ დგანან. მე მინდა მივმართო მშობლებს, ბებიებს, ბაბუებს, რომლებიც ნერვიულობენ დაკავებულებთან დაკავშირებით. მინდა იცოდეთ, რომ პროცედურულად ჩვენს კომუნიკაციას გარკვეული საათები სჭირდება. თუმცა, როგორც გითხარით შეგიძლიათ კვლავ დარეკოთ ჩვენს ცხელ ხაზზე და ჩვენ ყველა მათგანს აუცილებლად შევხვდებით და ოჯახს ვაცნობებთ მათი მდგომარეობის შესახებ.ჩვენ ვხედავთ, რომ ხელისუფლება უკვე კვირებია გავიდა კონსტიტუციური რეჟიმიდან. ჩვენ, ადვოკატები, მზად ვართ, ისინი დავაბრუნოთ სამართლებრივ რეჟიმში და თითოეულ ძალადობას, თითოეულ უკანონობას და მიზანმიმართულ ანგარიშსწორებას, აი, ამ გულანთებული, მშვიდობიანი მომიტინგეების მიმართ, აუცილებლად დაერქმევა სამართლებრივი სახელი", - ამბობს პატარიძე "მთავარი არხის" პირდაპირ ეთერში საუბრისას.
ცნობისთვის, საპროტესტო აქციის ფონზე, პარლამენტის იურიდიულ საკითხთა კომიტეტმა სხდომაზე „უცხოური გავლენის გამჭვირვალობის შესახებ“ კანონპროექტი მესამე მოსმენით განიხილა და მას მხარი დაუჭირა.
საპროტესტო აქცია "არა რუსულ კანონს" მონაწილეები პარლამენტის შენობის უკანა შესასვლელთან ღამე გაათენეს და დილამდე დარჩნენ - ადგილზე სამართალდამცველები არიან.
შინაგან საქმეთა სამინისტროს ინფორმაციით, პარლამენტთან, აქციაზე 20 პირია დაკავებული, აქედან 3 პირი უცხო ქვეყნის მოქალაქეა - 1 რუსეთის, 2 ამერიკის შეერთებული შტატების
ცნობისთვის, პრეზიდენტმა განაცხადა: 1 ნოემბრისთვის გადაიტანეთ "უცხოური გავლენის გამჭვირვალობის შესახებ"კანონის ამოქმედების ვადა - არჩევნების მერე, ვინც მოვა ხელისუფლებაში, ის გადაწყვეტს, ეს კანონი რუსულია, თუ რაიმე სხვა კანონის გადამღერება
ასევე, პრემიერის თქმით, ხვალ და ზეგ საქართველოს პარლამენტი გეგმავს "უცხოური გავლენის გამჭვირვალობის შესახებ" კანონის მიღებას მესამე მოსმენით - გადაწყვეტილებები მიიღება ხალხის უმრავლესობის ინტერესების შესაბამისად
პარლამენტმა „უცხოური გავლენის გამჭვირვალობის შესახებ“ კანონპროექტი მეორე მოსმენით მიიღო
შეგახსენებთ, ევროპარლამენტმა საქართველოში "უცხოური გავლენის გამჭვირვალობის კანონპროექტთან" დაკავშირებით რეზოლუცია მიიღო. მას მხარი დაუჭირა 425-მა ევროპარლამენტმა, წინააღმდეგ 25 წავიდა, თავი შეიკავა 30-მა ევროპარლამენტარმა. - ევროპარლამენტი ევროსაბჭოსა და პარტნიორებს მოუწოდებს, ივანიშვილისთვის პირადი სანქციების დაწესება განიხილონ
საქართველოში ამერიკის ყოფილი ელჩის თქმით, კანონი "უცხოელი აგენტების" შესახებ, შესაძლოა, შემოიღონ იმის უზრუნველსაყოფად, რომ არ არსებობდნენ საერთაშორისო დამკვირვებლები
საქართველოს პარლამენტმა პირველი მოსმენით „უცხოური გავლენის გამჭვირვალობის" კანონპროექტი მიიღო
2024 წლის 16 აპრილს საქართველოს პრეზიდენტმა სალომე ზურაბიშვილმა შარლ მიშელსა და ემანუელ მაკრონს მიმართა, საქართველოში განვითარებული მოვლენები ევროპული საბჭოს ხვალინდელ სხდომაზე განიხილონ, მიუხედავად იმისა, რომ საკითხი სხდომის დღის წესრიგში შეტანილი არ არის..
2024 წლის 9 აპრილს "კი ევროპას! არა რუსულ კანონს!" - თბილისში მსვლელობა დაიწყო, რომელიც, საპროტესტო აქციებით დღემდე გრძელდება.
