„აღნიშნული კანონმდებლობა მნიშვნელოვანია, რათა დაცული იყოს ქვეყნის ინტერესები და არავის მიეცეს შესაძლებლობა, სხვა ქვეყნების გავლით აქ შემოვიდეს თანხები, მოხდეს საზოგადოების გახლეჩა, დაპირისპირება, რევოლუციების მოწყობა, აგენტურის დაფინანსება“, - ასე პასუხობს თბილისის მერი კახა კალაძე ჟურნალისტის კითხვას ეუთო-ს ადამიანის უფლებათა ოფისის (ODHIR) მიერ გავრცელებულ განცხადებაზე, რომელშიც ორგანიზაცია შეშფოთებას გამოთქვამს საქართველოს ხელისუფლების მიერ მიღებული კანონის - „უცხოელი აგენტების რეგისტრაციის აქტის“ მიმართ.
„თქვენ როდიდან დაიწყეთ ამ ორგანიზაციის აღიარება? თქვენ პირიქით ამბობდით, ვინ არის ეუთო/ოდირი, არაფერს წარმოადგენს და არც მათი განცხადებები არჩევნებთან დაკავშირებით არაფერს წარმოადგენსო. თუ რამეს ვიტყუები, შეგიძლიათ, ამოიღოთ არქივი და ნახოთ თქვენი რადიკალური პოლიტიკოსების განცხადებები ეუთო/ოდირთან დაკავშირებით. ამ ორგანიზაციის განცხადებას, რა თქმა უნდა, ვითვალისწინებთ და სიფრთხილით ვეკიდებით. ზუსტად იგივე მიდგომა და დამოკიდებულება იქნება, რაც ამერიკის შეერთებულ შტატებშია, ტყუილად არ გადმოგვიღია. აგენტურა, ქვეყნის ღალატი, რა თქმა უნდა, ძალიან მძიმეა ქვეყნისთვის.
აღნიშნული კანონმდებლობა მნიშვნელოვანია, რათა დაცული იყოს ქვეყნის ინტერესები და არავის მიეცეს შესაძლებლობა, სხვა ქვეყნების გავლით აქ შემოვიდეს თანხები, მოხდეს საზოგადოების გახლეჩა, დაპირისპირება, რევოლუციების მოწყობა, აგენტურის დაფინანსება. ეს ყველაფერი დამთავრდება, ჩემო მეგობრებო. რაც იყო წლების წინ, ის ვეღარ იქნება და ვეღარ მოხდება“, - განაცხადა კახა კალაძემ.
