რადგანაც სასამართლო არ ემორჩილება გარედან მიღებულ გადაწყვეტილებებს და მოსამართლეები იღებენ იმ გადაწყვეტილებებს, რაც მათ მიაჩნიათ სწორად, აქედან გამომდინარე მოხდა დასანქცირებაც, - განაცხადა სააპელაციო სასამართლოს მოსამართლემ, ლევან მურუსიძემ მის სანქცირების საკითხზე საუბრისას.
„არა ლოგიკურია და სიმართლე გითხრათ, მე ამას ველოდებოდი იმ ტენდენციებიდან გამომდინარე, რაც ხდებოდა სასამართლოსთან მიმართებით
როდესაც მე იუსტიციის საბჭოს მდივანი ვიყავი, ჩემთან ჰქონდათ ურთიერთობები სხვადასხვა წარმომადგენლებს - ახლა არ დავაკონკრეტებ და საუბარი იყო „ვეტინგზე“, ანუ იყო მიმართულება იმაზე, რომ ჩვენ დავთანხმებოდით არასასურველი მოსამართლეებს დაეტოვებინათ სასამართლო კორპუსი და სასამართლო სისტემაში დარჩენილიყვნენ ის მოსამართლეები, რომლებიც იქნებოდნენ მათი პოლიტიკის მიმართ ლოიალური. ეს სჭირდებათ იმისთვის, რომ სასამართლო არის ბერკეტი პოლიტიკის განსახორციელებლად. მაგალითად, რუმინეთში რაც მოხდა - პირველ ტურში კანდიდატმა გაიმარჯვა და გააუქმეს. არ მივეცით იმის საშუალება, რომ ქვეყანაში განხორციელებულიყო „ვეტინგი“ და სასამართლო სისტემის გაწმენდა. ახლა გადავიდნენ ამ სანქციებზე. აქ ამას კორუფციასთან არავითარი კავშირი არ აქვს. მე ამას ვუყურებ ძალიან მტკიცედ და მშვიდად და რაც უფრო მეტი ზეწოლა იქნება გარედა, მინდა დავარწმუნო ყველა, რომ უფრო მტკიცენი ვიქნებით ჩვენ ამასთან მიმართებით.
რადგანაც სასამართლო არ ემორჩილება გარედან მიღებულ გადაწყვეტილებებს და მოსამართლეები იღებენ იმ გადაწყვეტილებებს, რაც მათ მიაჩნიათ სწორად, აქედან გამომდინარე მოხდა დასანქცირებაც“, - განაცხადა მურუსიძემ.
შეგახსენებთ, დიდი ბრიტანეთის მთავრობამ საქართველოს იუსტიციის უმაღლესი საბჭოს წევრი, თბილისის სააპელაციო სასამართლოს მოსამართლე, ლევან მურუსიძე და თბილისის სააპელაციო სასამართლოს თავმჯდომარე, მიხეილ ჩინჩალაძე სანქცირებულთა სიაში შეიყვანა.
