მწერალ ბორის აკუნინი (ნამდვილი გვარი გრიგორი ჩხარტიშვილი, რუსეთის ფედერაციაში აღიარებული უცხო ქვეყნის აგენტად, ტერორისტებისა და ექსტრემისტების სიაში შეყვანილი) სისხლის სამართლის მუხლით იძებნება. ამის შესახებ ნათქვამია რუსეთის შინაგან საქმეთა სამინისტროს საძიებო მონაცემთა ბაზის ინფორმაციაში.
"გრიგოლ შალვას ძე ჩხარტიშვილი. დაბადებული 1956 წლის 20 მაისს. იძებნება რუსეთის ფედერაციის სისხლის სამართლის კოდექსის მუხლით", - ნათქვამია მონაცემთა ბაზაში. ბაზაში არ არის მითითებული, რა მუხლით მიმდინარეობს ძიება.
აკუნინის წინააღმდეგ რუსეთმა ასევე აღიძრა საქმე ტერორიზმის საჯარო დასაბუთებისა და რუსეთის ფედერაციის შეიარაღებული ძალების ქმედებების შესახებ განზრახ ყალბი ინფორმაციის საჯაროდ გავრცელებისთვის (რუსეთის ფედერაციის სისხლის სამართლის კოდექსის 205.2 მუხლი, 207.3 მუხლი).
ცნობისთვის, რუსი მწერალი და, ამასთანავე, ლიტერატურათმცოდნე, იაპონისტი, მთარგმნელი და საზოგადო მოღვაწე გრიგოლ ჩხარტიშვილი, რომელიც ბორის აკუნინის ფსევდონიმითაა ცნობილი, 1956 წელს საქართველოში, ზესტაფონში, დაიბადა. მისი ოჯახი მალევე გადავიდა საცხოვრებლად მოსკოვში, სადაც მწერალი გაიზარდა. სწავლობდა რუსეთში, ისტორია-ფილოლოგიის ფაკულტეტზე, აქვს ისტორიკოს–იაპონიისმცოდნის დიპლომი.
არის მხატვრული ლიტერატურის მთარგმნელი ინგლისური და იაპონური ენებიდან. გამოქვეყნებული აქვს როგორც ესეისტიკა („მწერალი და თვითმკვლელობა“ 1999), ისე ისტორიული ჟანრის ნაწარმოებები („რუსეთის სახელმწიფოს ისტორია“, 2013-იდან დღემდე) . პირველი მხატვრული ნაწარმოები ბორის აკუნინის სახელით 1998 წელს გამოაქვეყნა.
განსაკუთრებული პოპულარობა მწერალს მოუტანა ისტორიულ-დეტექტიური რომანების სერიამ ერასტ ფანდორინზე. მისი რომანები თარგმნილია მრავალ ენაზე და მრავალჯერაა ეკრანიზებული.
