დევნილთა, ეკომიგრანტთა და საარსებო წყაროებით უზრუნველყოფის სააგენტოს ინფორმაციით, რუსთავში, ახალაშენებულ კორპუსებში, ბინების განაწილების მიზნით, იძულებით გადაადგილებული ოჯახების მონიტორინგის პროცესს მიმდინარე წლის სექტემბრიდან დაიწყებს.
"როგორც ცნობილია, რუსთავში, 800 დევნილი ოჯახებისთვის თანამედროვე სტანდარტების შესაბამისი საცხოვრებელი კომპლექსის მშენებლობა აქტიურ რეჟიმში მიმდინარეობს.
პარალელურ რეჟიმში, უკანასკნელი თვეების განმავლობაში, ბინის მიღების მსურველი 7 000-ზე მეტი დევნილი ოჯახის განაცხადი შეფასდა და წინასწარი ქულები სააგენტოს ვებგვერდზე გამოქვეყნდა.
სიის გამოქვეყნებიდან, 15 სამუშაო დღის ვადაში, იძულებით გადაადგილებულ ოჯახებს დამატებითი დოკუმენტაცის წარმოდგენის შესაძლებლობა ჰქონდათ. შესაბამისი საფუძვლის გათვალისწინებით, წინასწარი ქულების ნაწილი გადაფასდა. განახლებული სია სააგენტოს ვებგვერდზე ქვეყნდება.
დევნილთა გრძელვადიანი განსახლების კრიტერიუმების შესაბამისად მინიჭებული ქულები შესაძლებლობას იძლევა განისაზღვროს პრიორიტეტულობა, რათა ყველაზე მწვავე საჭიროების მქონე იძულებით გადაადგილებულ ოჯახების შესწავლა განხორციელდეს. განსახლების კრიტერიუმები განსაზღვრავს, დევნილი ოჯახის როგორც საცხოვრებელ, ისე სოციალურ მდგომარეობას.
დევნილთა საკითხების შემსწავლელმა კომისიამ, არსებული საბინაო რესურსის გათვალისწინებით, განსაზღვრა რამდენ ქულიანი ოჯახები დაექვემდებარებიან მონიტორინგს:
▪︎ ერთოთახიანი ბინების განაწილების მიზნით, მონიტორინგს დაექვემდებარებიან ის დევნილი ოჯახები, რომელთა განაცხადს მინიჭებული აქვს 5 და მეტი ქულა;
▪︎ ოროთახიანი ბინების განაწილების მიზნით, მონიტორინგს დაექვემდებარებიან დევნილი ოჯახები, რომელთა განაცხადს მინიჭებული აქვს 6 და მეტი ქულა;
▪︎ სამოთახიანი ბინების განაწილების მიზნით, მონიტორინგს დაექვემდებარებიან დევნილი ოჯახები, რომელთა განაცხადს მინიჭებული აქვს 7 და მეტი ქულა;
▪︎ ოთხოთახიანი ბინების განაწილების მიზნით, მონიტორინგს დაექვემდებარებიან დევნილი ოჯახები, რომელთა განაცხადს მინიჭებული აქვს 1 და მეტი ქულა.
მოკვლეული მასალა გადაწყვეტილების მისაღებად, დევნილთა საკითხების შემსწავლელ კომისიას წარედგინება. ბინების განაწილების პროცესი ყველა ეტაპზე, მინისტრის 01-30/ნ ბრძანების შესაბამისად, კანონმდებლობის სრული დაცვით, წარიმართება.
იმ იძულებით გადაადგილებული ოჯახების საცხოვრებლით უზრუნველყოფის საკითხი, რომელთა ქულა ამ მომენტისთვის არ აღმოჩნდა საკმარისი მონიტორინგისთვის განსახლების მომდევნო ეტაპზე განიხილება. - - ნათქვამია დაააგენტოს გავრცელებულ ინფორმაციაში.
➡️︎ რუსთავში ბინის მიღების მსურველი დევნილი ოჯახებისთვის მინიჭებული ქულები იხილეთ აქ: https://shorturl.at/J4ZDf