ორგანიზაცია "ერთად ვებრძოლოთ დიუშენის კუნთოვან დისტროფიას" თავმჯდომარე ზაქრო გვიშიანი დიუშენის კუნთოვანი დისტროფიით დაავადებული ბავშვების მშობლების ერთობლივ მიმართვას ავრცელებს, რომელსაც "აიპრესი" უცვლელად გთავაზობთ.
დიუშენის კუნთოვანი დისტროფია გენეტიკური დაავადებაა, რომელიც იწვევს ადრეულ ასაკში კუნთების განლევას და ფატალურ შედეგს. საქართველოში დიუშენით დაავადებული ასამდე ბავშვია. ბავშვების მშობლები უკვე ორი წელია სახელმწიფოსგან ვითხოვთ მკურნალობის დაფინანსებას და დაახლოებით 3 თვეა რაც ვითხოვთ პრემიერ მინისტრ ირაკლი კობახიძესთან შეხვედრას, თუმცა უშედეგოდ. სახელმწიფოს უმოქმედობის შედეგად ბავშვები ყოველწლიურად იღუპებიან. სახელმწიფომ მხოლოდ ქუჩის პროტესტის შედეგად მიიღო გადაწყვეტილება დიუშენის პაციენტებისთვის მრავალმხრივი კვლევების დაფინანსებაზე, რაც აუცილებელია მაგრამ არ არის საკმარისი ბავშვების გადასარჩენად.
ხელისუფლების წარმომადგენლების და სხვადასხვა ექსპერტების მხრიდან ხშირად კეთდება ცალმხრივი და არაობიექტური ან არაკომპეტენტური განცხადებები დიუშენის სამკურნალო მედიკამენტებთან დაკავშირებით.
ჩვენ უკვე გავავრცელეთ მიმართვა და საზოგადოებრივ მაუწყებელს მოვუწოდეთ სტუდიაში საეთერო დრო დაგვითმოს https://netgazeti.ge/news/804699/
ახლა უკვე განმეორებით მოგმართავთ თხოვნით დაგვითმოთ საეთერო დრო დიუშენის კუნთოვანი დისტროფიით დაავადებული ბავშვების მშობლებს. ჩვენ ასევე გამოვთქვამთ მზაობას რომ მონაწილეობა მივიღოთ ამ თემაზე ღია დებატებში, დიალოგში თუ დისკუსიაში ხელისუფლებასთან, ექსპერტებთან და სხვა დაინტერესებულ პირებთან ერთად." - ნათქვამია მიმართვაში.
