2023 წლის დეკემბრის შემდეგ, სამწუხაროდ, საქართველოს ხელისუფლებამ გადაწყვიტა, არ მიეღო ის კანონები, რომლებიც გვაქვს ევროკავშირში, არამედ მიეღო კანონები, რომლებიც ეწინააღმდეგება ევროკავშირის წესებს, პრინციპებს, – ამის შესახებ საქართველოში ევროკავშირის ელჩმა, პაველ ჰერჩინსკიმ ჟურნალისტებს განუცხადა.
ჰერჩინსკის თქმით, ამ კანონებით შეუძლებელი იქნება, საქართველო ევროკავშირის წევრი გახდეს.
„ევროკავშირის წევრმა სახელმწიფოებმა ერთხმად გადაწყვიტეს საქართველოსთვის ოფიციალურად კანდიდატის სტატუსის მინიჭება. რას ნიშნავს ეს? ჩვენ გავუღეთ კარი საქართველოს, გახდეს ევროკავშირის წევრი. იმისათვის, რომ ეს მოხდეს, საქართველო თანდათანობით უნდა გახდეს ჩვენიანი. ამისთვის მთავარი წინაპირობაა ევროკავშირის წევრ სახელმწიფოებში არსებული კანონების, წესებისა და რეგულაციების მიღება. იმ ისტორიული მომენტიდან, 2023 წლის დეკემბრის შემდეგ, სამწუხაროდ, საქართველოს ხელისუფლებამ გადაწყვიტა, არ მიეღო ის კანონები, რომლებიც გვაქვს ევროკავშირში, არამედ მიეღო კანონები, რომლებიც ეწინააღმდეგება ევროკავშირის წესებს, ევროკავშირის რეგულაციებს, პრინციპებს. სამწუხაროდ, ე.წ. უცხოური გავლენის გამჭვირვალობის კანონს, ე.წ. უცხოური აგენტების, „ფარას“ კანონს, რომელიც არის ამერიკული კანონმდებლობის ანალოგი, არაფერი აქვს საერთო ევროპულ კანონმდებლობასთან.
ვენეციის კომისია, რომელიც ევროპის საბჭოს ორგანოა და საქართველო ევროპის საბჭოს სრულუფლებიანი წევრია, თავის უახლეს, 20-ზე მეტგვერდიან დასკვნაში ნათლად ამბობს, რომ ეს კანონები არა მხოლოდ ევროპულ კანონმდებლობას ეწინააღმდეგება, არამედ საქართველოს ვალდებულებებს ევროპის საბჭოს წინაშე.
სამწუხარო რეალობაა, რომ წელიწად-ნახევარზე მეტი ხნის განმავლობაში საქართველოში მრავალი სხვადასხვა კანონი იქნა მიღებული. არა მხოლოდ გამჭვირვალობის შესახებ კანონი, „ფარა“, არამედ გრანტების შესახებ კანონში შესწორებული ცვლილებები, მაუწყებლობის შესახებ კანონი და მრავალი სხვა. პრაქტიკულად, ყოველდღე შემოდის ახალი კანონები ან იცვლება, რომლებიც ეწინააღმდეგება იმ პრინციპებს, რომლებზეც ევროკავშირია აგებული. ძალიან ვწუხვარ, რომ ამას ვამბობ, მაგრამ, როგორც უმაღლესმა წარმომადგენელმა, ვიცე-პრეზიდენტმა კაია კალასმა გასულ ორშაბათს ხმამაღლა და ნათლად განაცხადა, ამ კანონებით შეუძლებელი იქნება საქართველო ევროკავშირის წევრი გახდეს. ძალიან ვწუხვარ, რომ ამას ასე ღიად და ხმამაღლა ვამბობ“, – განაცხადა პაველ ჰერჩინსკიმ.
